Jam 5 | KYG | STEP | Asole kagemi yatapimo hane'niya vaya'mogitapae, lapakufale'mo afole aisiya hanageke yafe'mo lapakesamo ne'afitapa ai ai aetapa avi'ya hiyo.

James 5

Asole kagemi ya'apimo hane'niya vaya'aife'mo hu'niya gemae

1 Asole kagemi yatapimo hane'niya vaya'mogitapae, lapakufale'mo afole aisiya hanageke yafe'mo lapakesamo ne'afitapa ai ai aetapa avi'ya hiyo. 2 Kagemi yatapimo kasalige kukenatapimo kafamo'mo hatagauge monitapile'mo o'ani'ya faige huno hane'niye. 3 Monitapile'mo o'ani'ya fai'niya ya'mo'a agoti huno lapateteno atagana huno leno lapasaga ligiye. Lapakaemo henaga afinafe'mo mago'e kagemi yatapimo alita anupa hutapa malege malege hutapa ne'maiye. 4 Ali'yatapimo ne'aliya vaya'mogi hoyatapifi'mo ali'ya'mo ne'aliya vaya'aife'mo humi ne'apatetapa hosu miya'mo ne'apamiye. O'apami'naya monimo'mo hosu kavatapie'mo keya aeno ge hugekana huno hane'niye. Ali'yatapimo ne'aliya vaya'mogi keya ae'a ge nehageno'ae'mo Ala kava ne'mo'a muki koku'napi ne'maiya vaya'aite'mo yagaino ne'apateya vekamo'a ani keya ae'a ge nehaya gemo ne'afiye. 5 Lapakaemo muki ma mopafi kagemi yatapimo agetapa alita malege lapakufamo'mo hau'niya kava'mo huge hutapa mai'nae. Muki afina'mo afumo he'a lusi yagita nehaya kavakana hutapa mai'netapa apaipagu'e vayakana hutapa mai'nae. 6 Lapakaemo fatago vaya'aina agoti hutapa apatetetapae'mo kamiti apamagi'nae. Afa'amo mai'ne'apae'mo lapakaetegamo mago kava'mo osu'naya'monanafa fiku apamagi'nae.

Goti mafa'ne'aife'mo, o'ataleta atafauta alagi hu'netapa agava maiyo, huno hu'niya gemae

7 Konaga'nimogitapae, kagemi ya'api'e vaya'mogimo ani kava'mo nehaya'mofe'mo o'ataleta atafauta alagi hu'netapa agava maime maime ne'vigeno'ao Ala kava ne'mo emineno. Hoyamo ali'a ne'vaiya vaya'mogimo avina ya'mo nehakalaya afina'e ne'ya'mo hagesige'a alisaya afina'efe'mo o'atale'a atafau'a alagi hu'a mai'ne'apae'mo agava ne'maiye. 8 Ani kava hutapa atafauta alagi hu'netapae'mo o'ataleta agava maiyo. Ala kava ne'mo aise afina'mo emi'negaiyanagi lapaipamo alita lokiya vaitapa lapateyo. 9 Konaga'nimogitapae, hu'na, konagatapie'mo ge ohapaiyo fiku yanageno Goti'a hosu gemo nehae, huno hugiyanagi. Afiyo, hu'na, alino fako huno apatesiya vekamo kipate'mo he tino ne'maiye. 10 Konaga'nimogitapae, ema akeya'vilaga vaya'mogi Gotitegati gemo alini e'a ae'a hakalo hu'a hapa nepaiya vaya'ai kavafe'mo lapakesamo ne'afitapa apaiyakamo aliyo. Apakaemo Ala kava ne'mo agi'alefe'mo ge'amo hapa nepai'apae'mo kanamo ali'ne'apae'mo o'atale'a atafau'a alagi hu'a mai'nae. 11 Lagaemo, o'atale'a atafau'a alagi hu'a mai'naya vaya'aife'mo Goti'a, naulagale'mo alagepa hu'a mai'naya vayane, huno nehiye, huta nehune. Lapakaemo ago afi'nayana akeya'vilaga vekamo Yopu'a kanamo ali'neno'ae'mo o'ataleno atafauno alagi huno maime maime ne'egeno'ae'mo Ala kava ne'mo'a ha mae'niya kavafe'mo ava gemo ago afi'nae. He, Ala kava ne'mo'a lusi kava huno hau huno ne'apateno hau ayamopafi'mo nehaiya vekamo mai'niye, hutapa ago afi'nae.

12 Konaga'nimogitapae, hogote kava'mo ina kava'mo huno hane'niyanagi getapimo alita lokiya vaitapa atesayafe'mo hutapae'mo koku'nategae'mofi ma mopalefe'mofi alu yateti'efe'mofi hutapa alagi lama gemo nehuve, hutapa osiyo. Fiku yanageno Goti'a agoti huno lapategaiya'mofe'mo he, nehutapae'mo he'age'mo hiyo. Ha'ao, nehutapae'mo ha'ao'age'mo hiyo.

Siosi vaya'mogi hisaya kavafe'mo hu'niya gemae

13 Lapakaepati'mo mago vekamo'a kanamo ne'alisiyana nunumu hino. Lapakaepati'mo mago vekamo'a amogaga ne'aisiyana samu mono yokemo hino. 14 Lapakaepati'mo mago vekamo kaita nehaisiyana siosi vaya'aite'mo yagai'a ne'apataya vayatama vaya'aife'mo ge hino. Ge hisage'a e'a Ala kava ne'mo agi'aleti'mo uvelimo agenopale'mo fale'a atete'a nunumu hu'a ategae. 15 Apakaemo Gotife'mo apakesa afi'a fatago nehu'a nunumu hu'a atesageno Ala kava ne'mo'a alagepa huno alino he tino ategaiye. Kaita hau'niya vekamo'a hosu kava'mo hu'nisiyana Ala kava ne'mo'a alino atalegaiye. 16 Lapakaemo konagatapimogife'mo hosu kavatapie'mo aeta hakalo hutapa hapa paige'a apakaemo ani kava hu'a hosu kava'apie'mo ae'a hakalo hu'a lapa paisagetapa nunumu hutapa apatege'a ani kava hu'a nunumu hu'a lapatenagetapa higeno'ao Goti'a alino alagepa huno lapateno. Fatago vaya'mogimo aukaya hu'a nunumu hu'a ge hu'a afi nekageno'ae'mo Goti'a himamu lokiya'aleti'mo ali'ya'mo aliteno alino afole aino ne'ate. 17 Ilaiya'a velafa'mo mai'neno lagaekana huno mai'niya'monanafa lokiya vaino nunumu huno'ae'mo, ko o'aiyo, huno nunumu hu'nigeno lole'e mago'e kafuga'e sigisi'a kaile'e'mo ko o'ai'niye. 18 Halate nunumu hu'nigeno koku'napati'mo ko ai'nigeno'ae'mo mopafati'mo ne'ya'mo hage'niye.

19 Konaga'nimogitapae, lapakaepati'mo mago vekamo'a alagepa ka'mo ataleno uneno nehisigeno'ae'mo mago vekamo'a avalelino esiyana, 20 Hosu kava'mo nehiya vekamo'a hosu kava'mo osuno alagi atalesiyafe'mo alino aino atagi neno avalelino e'niya vekamo'mo, fali kavategati'mo agufamo alino katino atesigeno Goti'a asole hosu kava'amo aeno ati kaeno ategaiye, huno agesamo afigiye.